Hans Wipperfürth

Mi Mädche

 Mi Mädche
 Mi Mädche drät fein Pluute,
 nix an der falschen Plaatz;
 op werkdachs udder fierdachs,
 et mät sich immer staats;
 met Bängcher, Schleifcher, Schlöppche 
 ze baschte usstaffet;
 dat blonde Lockeköppche
 es immer fein frisseet;
 de Fingernäl ze tuppe
 krallrut un krallespetz,
 de Wimpere zo zuppe,
 et lang vürm Spejel sitz;
 et klimpert wie Jlöckche
 vum Schmuck dä an ihm bletz,
 op Afsätz, dönn wie Stöckche
 kütt et eranjestitz.
 Verjapp bes an de Ohre,
 wann et su vür mir steit,
 kann ich nit satt mich lore.
 Un wohin et och jeit,
 do spellt de eschte Jeig et,
 de Hätzdam op der Kaat - 
 doch mir allein nor zeich et,
 wie Jott er hät jemaat.
  
 Hans Wipperfürth
 „En Stadt voll Minsche“
 Zum Andenken an Meinen Vater, dem ich mein Kölsch verdanke.
 ISBN 3-927658-72-3
 rb