Hans Wipperfürth

Aus: En Stadt voll Minsche

Wat mer mingen Vatter verzällt hät

Arbeit ze baschte, doch zo winnich Häng –
Op der Marienburch en Stroß – sechs Woche –
Mer kome dobei öntlich en de Bräng –
Elf Stund der Dach – dat jeit der en de Knoche!
Hä dät en einer vun dä Villas wonne –
ne feine Mann! – Un einer vun dä Zoot,
dä och uns Arbeitslügge jot gesonne,
jov mallich wanne kom, e fründlich Woot.
Un wor der Eeschte, de Dachszick zo beede,
wanne dem Kaffejung bejäne dät –
Hat Hüser, stroßewies se zo vermeede,
un och Fabrike hoten im en Häd.
Et heeß, hä künnt sing Zinse nit verlevve.
Ne Schentelmänn, wie er im Boch beschrevve!

Wär wör nit nitsch jewäs op suvill Jlöck –
Mir hatten vill zo nöttele un floche –
Wä wör nit jän an singer Plaatz jeröck,
statt he met Hau un Hammer zo maloche?
Un dann: Die Rammer maaten jrad de Reih,
et letzte Stroßestöck wood faßjeklopp –
De Isere Poppe danzten om Pavei –
Et wor ne Ovend, jrad als wör et Mai –
Hä kom, dat jröße, schloß sing Huusdür op,
schoß sich die Naach en Kugel dorch de Kopp.

Hans Wipperfürth
„En Stadt voll Minsche“
Zum Andenken an Meinen Vater, dem ich mein Kölsch verdanke.
ISBN 3-927658-72-3
rb